UCRBC
Uniun cultura rumantscha Basilea e conturn

La historia dalla ucrbc

La historia da la UCRBC ei aunc buca veglia. Entschiet ha ei la primavera 2019 cun l’invit da glieud che tschontscha ni ha empriu romontsch sesents ella Svizra dal nordvest. All'entschatta organisav’ins circa mintga meins in inscunter, ch'era frequentaus da 10 tochen 15 persunas. La pandemia da Covid19 ha lura impediu ulteriuras scuntradas e duront pli che dus onns ha ei dau neginas sentupadas. Las iniziantas han schon stuiu temer la fin da quellas activitads. Grazia all'’iniziativa da Brida Fuhr-Deplazes, Karin Luzi e Ueli Tschamper han las scuntradas tuttina puspei saviu vegnir repridas. Suenter l’exempel dals inscunters el territori linguistic, che la Ligia Romontscha ha instradau, ei vegniu surpriu il num «Café Rumantsch» ed ei s'etablius aschia. El fratemp s’entupein nus mintga meins tochen vegn persunas da tut ils idioms e generaziuns. Quellas sentupadas han mussau clar, ch’ei dat era auters basegns. Famiglias giuvnas cun affons lessan s’entupar per garantir il manteniment dil lungatg e la cultura romontscha. Dapi cuort datti era l'idea da fuormar in pign chor pil cant communabel. Occurrenzas culturalas, concerts, sentupadas cun semegliontas uniuns d’auters loghens stattan en discussiun e planisaziun. Per stabilisar meglier tut quellas activitads ei vegnida fundada ils 18 da mars 2023 la UCRBC. En ina radunonza da fundaziun ein vegni deliberai ils statuts ed ei vegniu elegiu ina suprastonza.